close
影音連結
http://show.qzgb.com/flashapp/player.swf?host=show.qzgb.com&p=523334D&ismusic=1
第一幕
春嬌：志明仔，汝緊去看啫覓咧，門口若親像是一只貓咧呻爾。
志明：我來去看覓咧… （開門聲…）我苦，都是海仔汝即只痟貓公噢，啊障仔今仔毋揤門鈴，走來咧變鬼變怪啊
海仔：揤門鈴汝而驚了電，啊挵門汝而嫌大聲，啊我只好出學貓叫羅。
志明：入來噢。（關門聲…）嬌仔，發落茶水，痟貓公來拜訪羅。
春嬌：我來囉。啊是叨一只啊？我苦，都是海仔啊。海仔，啊汝今仔是障仔啊。
海仔：啊誠歹勢，啊著叁欠用則來揣汝啦。啊是安爾仔啦，阮老的噢，最近咧無想無俗啦…
志明：恁老的都退休去幾落年囉，障仔即擺則開始咧無想無俗啊？
海仔：啊汝都知，啊伊際退居二線啰，啊手咧無權啰，啊厝內就較罕討有儂客來去，啊以前懷規日來坐坐的，啊現在噢，無地通去看怹的頭囉。啊毋則老歲仔想說噢，欲揣一項啥來捏啦。
志明：恁老的都響個歲羅，佫按算欲變啥蠓啦。
海仔：伊按算，欲飼一只貓啦。
春嬌：欲飼貓毋較儈，阮老母隔壁迄個素珠啊，則隨生一岫爾，較花紅柳綠噢，據汝去揀噢。
志明：是素珠嬸怹厝內的貓母，生一岫貓仔。嬌仔汝說話著說好勢噢，無會予海仔驚死。啥乜素珠佫會生貓仔噢。
海仔：土貓噢？無法噢。阮老的要求說著響響響個，響個啥，波斯貓喺…
春嬌：波斯貓噢，無法噢。伊朗的看欲毋。佫要求較欲波斯的。
志明：若欲波斯的噢，佫是貴噢。真欲噢，我則斗汝問覓咧。
海仔：老歲仔家己身邊結一注錢咧。啊只欲伊會暢啊，免說一只貓，啊佫六十只貓伊嘛甘開。
志明：安爾仔好勢，即個社會噢，有錢啥都好解決。哪但波斯貓啊，佫若伊拉克貓，嘛有地通掠。我共汝斗問，啊若有消息噢，我馬上通知汝。
海仔：啊好噢。啊汝著會記得噢。啊即項代志噢，厝內老歲仔是掛腸掛肚咧，汝若是騙我，汝是會…喵~~~
第二幕
志明：海仔，海仔，啊汝的貓爾？
海仔：啊汝會貓啦!
志明：我是說恁老的飼的迄只波斯貓爾! 啊都毋捌看著啊。
海仔：從掠來就永毋捌飼咧即搭的。伊佮阮老的噢，徛佇怹學堂分的迄套舊厝咧。
志明：老歲仔愛踮舊厝較有老儂伴噢。啊障仔，迄只貓佫慣勢乎？
海仔：我苦，汝毋知噢，阮老的噢，顧迄只貓是若像咧顧細囝爾!
志明：我囝! 汝毋煞加一個，貓小弟吶!
海仔：汝則貓小弟啦! 阮老的現在規日噢，敿迄只貓縛牢牢，捏驚死，放驚飛。啊三日兩日著佫共伊洗身，捋毛。佫較可惡的是啊，厝內偆的？迄只貓佫激毋食。阮老的著佫刁工，去菜市咧，買兩尾響個鮮浞的坑phang，倒來炣予伊辭生，伊則欲食噢!
志明：啊當然羅。啊汝欲貴種個貓，就著貴種個飼法佫! 汝欲阮種個工資食的，就但飼土貓耳，我食肉伊吮骨，啊種個叫做，各司其職啦!
海仔：啊未了咧噢。即兩日啊，我著佫共迄只貓，去發落一個岫。啊舊厝迄爿噢，都按算紲落去欲共伊賣捒啦。啊我按算欲共舊厝迄兩個老的，啊連迄只波斯貓，啊連儂連貓，做一下搬來我即搭踮。
志明：啊好噢! 啊搬來做一下踮噢，較規氣噢! 省著汝安爾仔逐日咧雙頭走噢。來咱種個新的小區踮噢，環境好，所在開闊，免說儂啦，就若迄只貓來噢，伊都會加較快活噢!
海仔：汝咧快活貓咧袂快活啦!
志明：障仔啊，恁厝內迄只貓佫會撒行喺!
海仔：哪但撒行啊! 極其慍忳佫愚躕噢!
志明：障仔？迄只貓佫知說，恁老的是以前的校長，佫著傍伊的勢是毋？
海仔：汝則知啦! 迄只貓啦，從入阮厝門啊，就激仔規身軀皆力咧，即項亦袂對迄項亦袂對…
志明：即譜估計是恁老的鍍著。
海仔：乞阮老的慂歹去啦。
志明：海仔，毋是我咧愛說汝，即項啊，汝著檢討。汝欲是較早落頓咧，恁老的現在敢無閑咧佮孫。敢就無心情通去捏迄只貓羅。
海仔：欸，佫對對是吶! 阮老的噢，佫是連迄只貓都共伊號名吶! 叫，叫浪仔。
志明：我囝! 啊汝叫海仔，恁厝內迄只貓叫浪仔。海浪，海浪，看勢恁老的啊，是欲共伊促做恁小弟羅。
海仔：欲若正實是小弟啊，我早而共伊霸落去羅。
志明：啊是酵啊？障仔汝一個儂，規日咧敿一只貓袂斗得是酵？
海仔：啊我頭暫仔毋是共汝說羅，說我按算啊，動員阮老的，共迄套舊厝賣捒。
志明：是啊是啊，啊恁老的欲毋？
海仔：我都共伊說啊，說老的啊，汝懷錢噢，佫障仔反，早晏嘛是我的。啊倒不如厝賣捒，啊我轉現金來去囥咧銀行咧，較袂貶值。啊怹兩個老的都亦皆同意啊，啊都啊按算欲搬來我即搭啊。啊欲死啊，儂欲行迄只貓則咧毋行啦!
志明：啊是障仔？毋行共伊拖咧走攏無拖伊無法噢!
海仔：迄只貓若精爾噢! 聽啫說欲搬厝啊，即幾日開始羅，毋食亦毋啉啊，佫會撒行噢! 佫毋啉佫毋放噢!
志明：毋放! 毋放伊較艱苦咱!
海仔：迄只貓會擋得，阮老的咧袂擋得羅! 阮老的噢，看見即幾日迄只貓，毋食毋困佫毋放，是相疼去袂哭爸。說啥啥乜高級貓羅，儈生啥乜尿結石羅，若無按時放啊，說欲死就儈，是欠一下去好喙伊噢。
志明：我囝咧! 貓亦愛踮舊厝啊，看勢迄只貓噢，心態較偏老啊! 海仔，汝估計會做得去教迄只貓唱麴得。
海仔：唱曲？啊一年四季伊都呻去三季羅佫佮伊唱麴! 阮規傢伙chiân吵著會溶尾， chiân免困。
志明：啊無欲障仔？攏無厝chiân毋賣噢!
海仔：佫對對噢! 阮老的現在的意思是說，迄只貓若毋搬啊，怹亦無按算欲搬羅。
志明：我囝! 恁一家儂去傳一只貓刁悾戇去吶! 迄塊破厝啊，早賣捒早好噢! 趁現在猶佫好好咧，欲是佫加幾年，厝身若佫較舊咧啊，到時恁就著削俗賣羅我共
恁講! 無恁嘛去租儂。迄塊舊厝若是去租儂啊，恁食的懷租金啊，就有够恁老的去買去一厝內較chhah-chhah的貓羅。障仔恁老的捌算毋捌除啊？
海仔：啊無法噢，啊據伊去噢，啊就當伊老戇羅，啊我苦，艱苦噢~~
第三幕
春嬌：志明啊，我今仔聽說，海仔怹老爸以前迄間學堂啊，迄搭欲改造吶!
志明：我苦啊! 啊海仔怹迄塊舊厝毋知會去改造著袂吶，我趕緊來共伊叫來問覓咧。
海仔：志明啊，開門吶。
志明：我囝! 痟貓公僎緊就來羅啊。啊障仔啊，海仔，汝今仔障仔連貓煞送來啊？聽說恁舊厝迄跡，欲改造是毋？啊會去改造著袂？
海仔：我囝! 險險，無著! 我共汝說啊，無即擺說欲改造啊，我毋知說佫阮厝內即只貓叫"招財貓"啊! 會招財佫會進寶啊!
志明：啊汝毋是欠一下欲共伊拆食落去，障仔，今仔僎反常啊？
海仔：汝若共伊拆食落去，我就共汝拆食落去! 汝毋知噢，即擺阮老的迄塊舊厝啊，周邊說是欲大改建，說是欲啥乜做大商場羅，創意空間羅，無所不。結果我即兩日噢，我去叫響個評估的，來共阮即塊厝看覓咧。汝知怹障仔說毋？怹說啊，即跡將來發展的潛力啊，拍死儂大，連阮即塊舊厝都綴升值吶! 欸，我偷共汝說噢，無形當中啊，阮即塊破舊厝，就加升值去三倍外…
志明：我囝咧! 天咧落紅雨，儂咧行坦橫運吶!
海仔：毋是噢，是傍即只貓的福氣噢! 即擺毋是行儂運，是行貓運噢!
編輯：星期绿
資料來源 ： 百度閩南吧 http://tieba.baidu.com/f?kz=750158358
全站熱搜
留言列表
