可能chue7無像台語歌，遮呢啊有爭議性了。
有時爭議像天差咧地...天大咧海！
爭議來自伊的歷史過程，來自伊的多元環境...
有聽著人咧講...
＂五月天的台語歌，一點俗味都無...＂
＂看伍佰的演唱，是台灣人生活的一部分...＂
＂江蕙、黃乙玲即馬唱的歌叫做 都會台語歌...＂
＂哭腔...孫淑媚的上有代表性...＂
＂陳雷，俗擱有力...＂
＂大支的...啥物是台灣的HIP HOP...＂
＂秀蘭瑪雅...he1叫做R&B...＂
＂台灣電子舞曲女王...謝金燕＂
＂詹雅雯堅持演歌風格，因為he1是部分台灣人嘛堅持的口味...＂
＂鄭進一是台灣的蘇東坡...＂
＂聽黃文星唱台語歌，你會發現 單純 也可以如此動人...＂
台語歌早期因為政治環境的關係，多數的風格是比較偏哀怨的，壓抑的，內收中帶著幾分仔對社會的不滿佮無奈。在政治環境改變了後，感情大大的外放，表達的風格呈現多元的色彩。
＂心事誰人知＂佮＂愛拼才會贏＂拄好企在時代轉變的交界線！
台灣人樂天知命，感情內斂，但是另外一方面擱勤奮扑拼！在被壓抑的時代環境之下，猶原認份耐勞。因此描寫台灣人無向命運低頭的＂愛拼才會贏＂，＂三分天注定，七分靠扑拚＂奮鬥精神，叫醒了屬於台灣人的民族靈魂。
被稱勵志（le7-ci3）的歌曲，是台語歌上有代表性的標誌。像＂燒肉粽＂、＂歡喜就好＂即類的歌曲，雖然嘛有自我勉勵的內涵，但是畢竟抑是傳達樂天知命的人生觀，比起來有積極意義的勵志歌曲，不但自我勉勵，嘛勉勵大家扑拚向上，創造未來好前程，屬於擱卡理想的層次。
不管你的心目中，台語歌是啥物款的面貌，台語歌...就是咱的歌！
講出我心目中各種面貌的台語歌，今啊日先來排上有代表性的十大勵志的台語歌...
1.愛拼才會贏
即首由陳百潭作曲作詞，葉啟田所演唱的歌曲，差不多變做台灣人精神象徵，會使講全世界有河洛民族的所在，攏聽會著＂三分天註定，七分靠扑拚＂愛拼會贏人生真理的聲音，是上有代表性勵志歌曲，第一名當之無愧！
2.世界第一等
即首由伍佰作曲，李安修/陳富榮作詞，由港星劉德華演唱，真正是本土國際化的一首風格真特別台語歌。不管台語歌在你的心目中是啥款的面貌，多數攏袂排斥即首歌。歌詞所表現來的意涵，原本嘛是卡偏向樂天知命的人生觀，但是一句一句的＂世界第一等＂，提醒了台灣人，在＂愛拼才會贏＂了後，台灣有真濟產品佮文化，已經企上世界第一等的地位，會使講即首＂世界第一等＂是體現了台灣人＂愛拼才會贏＂的奮鬥了後，精神昇華的表現。
3.出頭天
五月天的歌，雖然近年來台語歌的作品卡少去矣，但是一首歌壓死歸厝間的歌。因為即首勉勵少年努力奮發出頭天的歌，予人感動入心，尤其在供一个時期，台灣人又擱陷入異族統治的不堪處境，暫時撫慰著台灣人的心。＂人生不驚風湧，只驚家己無志氣＂，有聽著否？毋通失去志氣，只要咱團結扑拚...＂永遠等待彼一日，咱會當出頭天，阮向望的日子，會真緊來臵阮身邊...＂！
4.向前行
林強所作詞作曲的＂向前行＂被稱為新台語歌的前鋒代表，雖然歌詞內容嘛是出外扑拚的游子心情，但是無傳統台語歌的苦情，充滿奮發積極的人生觀，ROCK風格，嘛展開了屬於台灣人Ｘ世代以後的活力樂觀精神，以及台語歌多元的大發展。這是一首上有時代意義的台灣歌！
5.你是我的兄弟
即首由傅振輝佮高向鵬所演唱的歌曲，過去由前內政部長黃主文先生所用來勉勵警消人員奉獻為民的精神象徵，後來被大量運用在競選的場合，甚至被認為是台聯黨的黨歌。俗語人咧講：出外靠朋友！在時下的工商社會，人與人講究分工合作，朋友間互相扶持互相牽成，在台灣人重義氣的精神內，朋友有時比親兄弟擱卡像兄弟，嘛是台灣經濟奇蹟的一個寫照。
6.有夢你會紅
在台灣經濟發展的彼个時代，＂愛拚才會贏，人人出頭天＂的奮發精神，使得新時代出現真濟的歌曲，行出悲情，鼓勵當時一切以拚經濟為目標台灣人，＂有夢上媠，希望相隨＂；因此吳宗憲即首＂有夢你會紅＂透過商品廣告的方式，打動了無數對經濟奇蹟抑歌懷有夢想的少年人的心。雖然後來隨著台灣資金大量外流，真濟人的夢煞來驚醒；＂有夢上媠，希望相隨＂的意念嘛變調，但是台灣求新求變的心，扑拼出頭天，維護台灣即塊招牌的精神，永遠就箭風向前行，一代傳一代。
7.堅持
由江志豐作詞作曲，翁立友演唱的＂堅持＂，堅持著台語歌傳統的氣味，跋倒擱爬起來，毋驚風雨，毋驚艱苦，逆風前進的奮發精神。＂有人出世著好命 阮是用命底打拚...＂唱出了本土佮外來的人生觀的對比，即種台灣人的扑拚精神，毋是外來的阿Ｑ文化所會當體會，所會當學習的。凡事就堅持咱的理想，一定就會唱出咱台灣家己的名。
8.再出發
台灣的棒球，經歷職棒隊成立，在國際的成績暫時失去光彩，又遭受職棒扑假球風波的衝激，在21世紀，出現一批被稱為＂阿甘世代＂的新代好手，加上國際棒壇開放職業選手參加國際性杯賽，因次佇2001年台灣舉辦第34屆世界盃棒球賽，主題曲＂再出發＂，即首濫著幾句華語的歌曲，唱出台灣棒球擱重新出發，chue7回當年世界五強的光榮感。對比著現此時台灣的經濟狀況，台灣人當家做主戰時的失落感，在中國的經濟發展停頓，外來政權的無能，真正予堅持扑拚的台灣人，擱一次＂再出發＂出頭天的好時代，台灣人應該好好來開創永久的國家基業。
9.成功的條件
＂大樓嘛是為地基一層一層來打起，哪有一步就登天這好的代誌＂，一步一骹印的人生真理，予葉啟田佇＂愛拼才會贏
＂了後，第二首受著讚賞的勵志歌曲。共款是簡單的歌詞，彼份屬於台語歌獨有直接的表達方式，唱出著台灣人踏實扑拚的精神。＂看別人的成功不免怨肚嘛不免膽志，甘知人的背後付出多少才有今日的地位＂講出著台灣人如何教育家己的子弟，希望藉著即首歌，予所有受著中國虛偽文化汙染的，行轉來咱早時台灣人的樸實、自信以及踏實！
10.逆轉勝
這是一首真令人感動的歌，勉勵人跋倒擱爬起來，人生難免有風有湧，在逆境當中，如擱繼續努力奮鬥，將可能的失敗轉化做最後勝利的動力。台灣人的生命力真韌，幾百年來受著外來異族的壓制迫害，但是從來就無向著不堪的處境來ann3頭，顛倒佇壓制之下，展現出創新、自信的再生力，做為一個台灣人，咱是感覺驕傲的。雖然現此時，外來政權結合著怹的野心祖國，無所不至的用心，愈來消滅台灣人的文化以及生存空間，但是台灣人逆境中求生存本能佮精神，阮相信最後的勝利光榮，是屬於咱家己的！
留言列表
