李勤岸
2000年開始，聯合國教科文組織 (UNESCO) 訂2月21日為世界母語日，並且每年tī 這工公告世界各地母語存亡ê現況，強烈呼籲世界各國攏有義務替人類保存共同ê語言資產。 2001年UNESCO所公告ê世界各地母語存亡報告書內底，特別提起台灣ê語言除了華語以外攏瀕臨死亡。台灣ê本土母語—台語、客語以及原住民語雖然程度有無仝，不過仝款攏是已經需要保護ê語言。雖然是台灣人ê本土母語，m̄-koh嘛siâng-sî是人類ê共有資產，咱無權利去kā傷害、蹧躂。
經過8冬， 2008年， 教育部選擇tī 母語日頒發母語貢獻獎予民間長期為母語復振付出心血ê人士以及團體。這是台灣對聯合國教科文組織ê呼籲，所做出ê具體回應，這是世界母語日ê台灣行動。咱用具體行動參世界各國tī仝一工實踐保護母語ê決心。
今年本土母語貢獻獎， 經由推薦、評審 ê 過程，選出無仝階層ê各界人士、母語團體， tī 逐个角落長期對母語救護、推廣ê行動者。
今年母語日ê另外一个行動，是由李江卻台語文教基金會、高雄羅馬字研習會、世界台灣母語聯盟、台文罔報雜誌社等12个單位，舊年發起今年續辦ê 「世界母語日母語競賽」，同時tī南、北二區舉辦幼稚園佮國小囡仔講古、朗讀比賽。這是共母語ê寄望囥tī後一代，培養咱ê細囝成做母語傳承ê行動者。
毋閣， 真遺憾， 今年母語日嘛出現壓迫本土母語ê 反動行為。咱攏掠準台灣已經是一个多元文化、多語社會ê國家， 歧視語言，壓迫母語ê野蠻行為應當是過去式矣， 千想萬想想袂到， tī世界母語日進前， tī農曆過年前， 由國民黨立委洪秀柱提案，全數刪除教育部國語會台語認證預算4000萬。4000萬tī 200外億國家預算內底是有夠少ê少， 雖然國語會苦苦相求， 希望莫按呢做， 若無，嘛莫總刪， 因為舊年台語認證ê試務工作佮試題工作攏已經標出去矣， 上無嘛愛留一寡仔予咱辦母語教師的認證。結果4000萬刪甲無半角!
In按呢做是咧共台語族群明示啥物? 講恁雖然是台灣上大ê族群， 毋閣恁上弱勢， 恁上無路用! 台灣逐種語言攏會使認證， 華語會使認證，客語會使認證， 原住民語會使認證， 英語嘛會使認證， 獨獨就是台語袂使! 按呢做是咧共全世界暗示啥物? 講恁祖媽就是野蠻人，欲共台灣ê本土母語， 一个一个屠殺予死， 恁講阮有義務保護人類ê語言資產? 阮無權利屠殺母語? 以前阮執政ê時，屠殺台灣母語ê任務猶未完成咧， tann 閣予阮提著政權矣， 阮會繼續執行未完成ê 任務!
這敢無食人夠夠! 母語日彼工咱一定愛有行動!
自由廣場 2009-2-17
http://www.libertytimes.com.tw/2009/new/feb/17/today-o2.htm
◎ 李勤岸
二○○○年開始，聯合國教科文組織（ＵＮＥＳＣＯ）訂二月二十一日為世界母語日，並且每年佇這工公告世界各地母語存亡的現況，強烈呼籲世界各國攏有義務替人類保存共同的語言資產。二○○一年ＵＮＥＳＣＯ所公告的世界各地母語存亡報告書內底，特別提起台灣的語言除了華語以外攏瀕臨死亡。台灣的本土母語—台語、客語以及原住民語雖然程度有無仝，不過仝款攏是已經需要保護的語言。雖然是台灣人的本土母語，毋閣嘛同時是人類的共有資產，咱無權利去共傷害、蹧躂。
真遺憾，今年母語日出現壓迫本土母語的反動行為。咱攏掠準台灣已經是一?多元文化、多語社會的民主國家！歧視語言、壓迫母語的野蠻行為應當是過去式矣。千想萬想想袂到，佇世界母語日進前，佇農曆過年前幾工，由國民黨立委洪秀柱提案，立法院全數刪除教育部國語會台語認證預算四千萬。四千萬佇一兆八千億的國家預算、六百億的教育部預算內底敢有佔著啥物輕重？雖然國語會苦苦相求，希望莫按呢做，若無，嘛莫總刪，因為舊年台語認證的試務工作佮試題工作攏已經標出去矣，上無嘛愛留一寡仔予咱辦母語教師的認證。結果四千萬刪甲無tshun半角銀！
按呢做是咧共台語族群明示啥物？講恁雖然是台灣上大的族群，毋閣恁上弱勢，恁上無路用！台灣逐種語言攏會使認證—華語會使認證，客語會使認證，原住民語會使認證，英語嘛會使認證，獨獨就是台語袂使！按呢做是咧共全世界暗示啥物？講恁祖媽就是野蠻人，欲共台灣的本土母語，一?一?屠殺予死，恁講阮有義務保護人類的語言資產？阮無權利屠殺母語？以前阮執政的時，屠殺台灣母語的任務猶未完成咧，今閣予阮提著政權矣，阮會繼續執行未完成的任務！
這敢無食人夠夠！母語日彼工咱一定愛有行動！
（作者為台師大台文所所長，世界台灣母語聯盟總召集人）
資料來源：台語心世界 Tâi-gú Sim Sè-kài http://ungian.pixnet.net/blog/post/26038009
留言列表
