close
李南衡
一二十冬前猶是烏名單的時代，林宗義先生雖然是世界知名的精神科醫生，但是伊在烏名單頂頭，無法度轉來台灣。有一冬，世界精神科醫學大會在加拿大舉行，大會主席團的主席是林宗義先生，伊在致開會辭的時陣，伊用英語及法語講：請容允我代先用我的母語致辭，伊著用台語致辭，了後才用英語、法語、德語、日語、中國普通話…致辭，伊得著真濟的拍噗仔聲，甚至有真濟人豎起來致意，在場對台灣去的精神科醫生及學者，逐個著眼箍紅、目屎流。一位醫生轉來台灣給我偷講：彼個場面實在太感動人！何時仔有可能在世界的醫學會頂面，聽著大會主席用咱的母語台灣話致辭？伊講的時陣目箍猶閣紅起來。
仝在烏名單的時代，在美國的一位台灣科學研究者，雖然在美國誠有成就，但是，伊亦是烏的。有一遍，法國政府邀請伊去法國一個研討會發表專題演講，伊接受邀請的同時，給邀請單位講，伊欲用伊的母語台灣話演講，請主辦單位著備辦一位會曉台語及法語的通譯人才，無幾工，伊接著通知講已經尋著會曉台語法語通譯的人矣，請伊放心。伊演講了，得著真濟拍噗仔聲。會後有一位法國的學者給伊講，假使你若用英語演講，可能有真濟人聽了會無歡喜，會問講：是按怎一個台灣的學者郤用英語演講？因為你用你的母語演講，大家顛倒尊敬你！即位學者著是今仔日在台灣擔任國科會副主委的謝清志先生。
世界知名的男高音何西卡例拉斯，在伊做囝仔的時陣著有一個夢：「有一工，全世界的人攏會當聽著我用母語，唱出我故鄉的歌。」伊出名了後，著出一塊唱片，完全用伊的母語卡搭羅尼亞語唱伊故鄉的歌。我當然緊去買一張表示敬意。
仝款在卡搭羅尼亞，一九九二年第二十五屆奧林匹克運動會，在卡搭羅尼亞的巴賽羅那舉行，七月二五開幕的時，主人西班牙國王卡羅斯一世先用卡搭羅尼亞語致辭了後，才用西班牙語致辭，得著全場的運動員及觀眾的歡呼致敬。因為國王尊重巴賽羅那當地人的母語。
講母語是一種尊嚴。你若無欲講母語，人是按怎著尊重一個無尊嚴的人？
（綠色和平廣播電台FM97.3歡迎收聽）
台灣日報 2002年08月05日
資料來源： 台灣茶黨 http://www.taiwantp.net/cgi/roadbbs.pl?board_id=7&type=show_post&post=76
全站熱搜
留言列表
