聽講爌肉飯是彰化三寶之一,在台中市賣爌肉飯个,儕 kah4若貓毛咧,真正是3腳步就有一間。但是其中抑是有袂少間是比較卡有名,是老台中人心目中有認定个。


"爌"即个詞,在台語抑擱用在煉湯,比如講"爌湯",就是用小火慢慢共湯頭煉出來,所以講"爌肉",嘛是共款个意思,逗逗共肉煉予食入滷汁个味。


"爌肉"如果是用大塊肉,不管是腿庫抑是三層,嘛叫做"大封 tua7 hong1",一般辦桌个,攏有即路菜,通常是濫筍干。啊若是講爌肉飯,就用腳庫抑是厚片个三層,佮在攪肉汁个白飯,一般攏擱有佮鹹菜總ㄚ(kiam5 chai3 cang2 a2 酸菜)抑是醃瓜ㄚ(iam1 kue1 a2 漬瓜)。



以早本人本底對肥肉卡無興趣,尤其是皮,因此對爌肉飯嘛卡無興趣,即點擱捌予阮細漢阿舅笑講...袂曉食物件。予我開始對爌肉飯產生興趣,甚至連皮都感覺比瘦肉卡好食,就是大智路靠近忠孝路个"蕭个爌肉飯"。


忠孝路佮大智路彼一帶,是台中市賣爌肉飯上密集个所在,抑擱有卡出名个,就是大麵炒佮碰皮湯(pong7 phue5 thng! 炸豬皮湯);因為即个附近,鐵工場真儕,擱是後火車站,公路局南站,市公車保養場,號稱全台灣上大个中連貨運總公司本底嘛在者,後來中連貨運遷徙(sua2)去工業區,當然對即附近嘛造成影響,所以講即个所在,勞動階層真儕,所以爌肉飯提供上好个需求。



蕭个爌肉飯,不管是腳庫抑是三層,攏滷 kah4真入味,完全無鹹个感覺,但是滷汁充分滷入肉內底,芳擱有味,肥肉入口即化,連瘦肉嘛爛擱袂澀;特別欲講个是鹹菜總ㄚ,用辣椒炒過,真正是天下第一味;因為是據在人客家己挟个,所以我逐遍去,攏挟規碗,無夠擱再挟。爌肉飯一碗50箍,湯一碗10箍,一般我攏是叫苦瓜湯抑是mi-soo湯,10箍个湯,但是有滋有味,小菜方面就比較卡無特色,營業時間是透早臵中晝頓。



講著爌肉飯,在台中市內,差不多就是無人不知,無人不曉个李ㄚ海,即馬分店嘛幾落間。李ㄚ海是做暗時ㄚ生理个,不過本人食个感覺,無啥特色;爛比袂過蕭个,khiu7(彈性,咬勁),比袂過山河,以阮个講法...食名聲个,所以留予外地人去食。



另外漢口路个魯肉義ㄚ,嘛是台中名聲真透个。魯肉義ㄚ,不管在肉个口感,經營个型態,攏佮蕭个爌肉飯有夠接近,連鹹菜總ㄚ个味攏差不多,不過以個人个感覺,抑是差一氣ㄚ,不過真正值得推薦个,營業時間佮李ㄚ海差不多,飯一碗55箍,湯一碗20箍,算是上貴个。



以早在西屯路佮建行路口,有一間員林爌肉飯,本底是對福龍街徙過來个,賣暗時个,肉滷了真有味嘛有爛,但是鹹,上有名是伊个綜合湯,後來擱徙去民權路綠園道,過來就無看咧開ㄚ。



在第五市ㄚ角間,嘛有一間爌肉飯,過去捌佮阮三舅去食幾遍,肉滷了有夠味,無真明顯个特色。另外卡有名个,擱有陳明統,山河,大中,第六街....等等。



山河佮大中嘛是在第二市ㄚ,市場內賣爌肉飯有夠儕个,不過以早攏去予李ㄚ海个名聲壓咧。山河肉个口感卡 khiu7,是阮細漢阿舅上合意个,不過店內菜佮湯攏粗粗ㄚ。


大中个肉爛擱真入味,東興路个第六街,肉接近第五市ㄚ佮財神爺,店內个白菜滷,真正一流个;忠孝路个陳明統,我毋捌食過,因為若去臵忠孝路,無去食蕭个爌肉飯,感覺無彩,所以有可能抑是無啥機會去食看覓。



爌肉飯是中部人个講法,南部人應該攏叫做滷肉飯;中部人講滷肉飯,南部人叫做肉燥飯,不過,南來北往,文化个透濫,兩種个講法,在台中攏會當看著。 








蕭个爌肉飯--腳庫





arrow
arrow
    全站熱搜

    lovepuppy999 發表在 痞客邦 留言(3) 人氣()